અધુરી આશમાં ઊઘડેલી આંખો
ને એમાંથી મંડાતી મીટ
વર્ષોની અતૃપ્ત જાગેલી ઝંખનામાં
બચેલાં સપનાંના
તમે શું રે કરશો મોલ?
ઉંબરની વચ્ચે અટવાયેલી ને
ધરબાયેલી તૃષ્ણાઓ
ઘરના ખૂણે સંભળાતા રૂદનમાં
ક્યાંક કોળતી લીલાશના
તમે શું રે કરશો મોલ?
હૈયું વલોવતી યાદોની અંદર
વખવખતી રાતો
વહેલી સવારે ઊગેલા ઓરતામાં
દેખાતી સોનેરી સાંજના
તમે શું રે કરશો મોલ?
અકળ મનમાં છુપાયેલી
આછેરી ભોળપ
પાંજરે બંધ પંખીની પીડામાં
તૂટી રહેલાં બંધનોના
તમે શું રે કરશો મોલ?
અબોલ વાણીમાં વહેતી
હર્ષની ધારાઓ
ઘસાતી હાથની રેખામાં
બચી ગયેલા ભાગ્યના
તમે શું રે કરશો મોલ?
No comments:
Post a Comment